Isang malaking isyu ngayon dito sa Mindanao lalo na sa mga probinsya ng Davao ang pagpapahinto ng pangulo sa mga grupo ng easy money investment schemes. Nagkakagulo ang mga tao dahil sa mga 'investment schemes' na naglipana at bigla-biglang sumusulpot na nag-aalok ng malalaking porsyento sa perang ihuhulog makalipas ang ilang araw. Sino ba ang hindi mahuhumaling sa halagang makukuha mo makalipas ang isang buwan? Kung maghuhulog ka ng limang-libong piso, pagdating ng pay-out mo ay magiging dalawampung-libong piso na.
Marami sa mga tao ang nagbenta ng mga ari-arian para may mai-hulog sa KAPA(Kabus-Padatuon), RIGEN Marketing, ALMAMICO at iba pang kumpanya na nag-aalok din ng parehong interest sa mga myembro. Makalipas lang ang ilang buwan ng pamamayagpag at pag-ooperate nang mga nabanggit na grupo, maraming buhay na ang nabago. Maraming mahihihirap na ang nakabayad sa mga pinagkautangan at nabawi na nila ang mga bagay na naibenta nila. May mga nakakakain na nang mga masasarap na pagkaing dati'y mayayaman lang ang may karapatang kumain. May mga magulang ang nabibigyan na ng matitinong damit, gamit at kalusugan ang mga anak nila. May nakakapagpa-aral na sa kolehiyo at may ilang nakapagpatayo na ng negosyo.
'Welling victims' ang tawag sa mga myembro at gustong sumali sa mga investment. Nangangahulugang sugal ang kanilang pinapasukan at walang katiyakan kung hanggang kelan magiging matatag ang samahan. Hangga't may mag-iinvest, tuloy ang takbo ng negosyo. Kung pagbabasehan ang takbo ng kanilang makinarya, maihahalintulad ito sa 'Ponzi Scheme' o pyramiding.
Pero ayon naman kay Pastor. J. Apolinario na founder ng KAPA, legal at may pisikal na mga pag-aari ang kanyang 'ministry' kaya may kakahayan siyang magbigay ng hanggang 30% love gift sa kanyang mga members. Higit niyang sinasabi na ang layunin niya ay tumulong sa mga kapus-palad sa Mindanao at buong bansa, at totoo naman talagang malaki ang naitutulong niya sa mga mahihirap, sa ngayon.
Maraming beses at patuloy na binabato ng mga isyu, aligasyon at kwestyon sa kridibilidad ang KAPA ministry. Maging ang Securities and Exchange Commission ay minsan nang pinag-initan ang nasabing grupo subalit lusot parin si Pastor dahil nakarehistro sa SEC ang KAPA.
Pero nagpanik at nagkagulo ang lahat ng tao myembro man o hindi matapos iutos ni pangulong Duterte sa NBI na hulihin na lahat nang mga Investment Scheme na nag-ooperate. Marami ang natakot na baka hindi na nila mabawi ang perang naihulog o naiinvest sa KAPA et. al. Maging ang mga magulang ko sa probinsya ay sumali rin at may naihulog na 20, 000 kabuuhang halaga, at ang masama pa, hindi pa nakakatanggap ng interest ang aking ina dahil wala pang isang buwan mula nang siya'y naghulog at ito'y ipinapasara na ng gobyerno. Marami ang nagalit sa presidente dahil sa utos niyang pagpapahinto sa lahat ng investment. May ilang nagsisisi na dahil sa pagboto sa kanya noong nakaraang halalan. May ilang dismayado dahil sa pag-aakalang pumapanig si Duterte sa mahihirap, pero siya pa mismo ang nagpahinto sa mga nakakatulong. At may ilang namang pinag-initan ang isang Pastor na nakilalang nagmamay-ari sa buong mundo.
Sa disisyong ginawa ng pangulo na hindi idinaan sa tamang proseso o due process, ano ang magiging epekto nito sa buhay ng maraming tao dito sa Mindanao? Ano ang magiging aksyon niya sa mga nanggagalaiti sa galit na mga myembrong may perang naihulog sa investment? Nang sumibol ang mga investment groups, bumaba lahat ang money related crimes gaya ng holdap, pagnanakaw, snatching, karnap at wala ng masyadong nagbebenta ng shabu. Higit sa lahat marami ang guminhawa sa buhay.
Kung ipapasara ang KAPA, RIGEN at ibang grupo,
sana man lang bigyan muna ng NBI nang pagkakataon ang mga nabanggit na maibalik ang
pera ng kawawang mga myembro bago nila hulihin ang mga namumuno nito para hindi magkagulo at may magamit pa ang mga tao sa paghahanap-buhay. At kapag tuluyan ng nahinto ang lahat ng 'Investment Scheme', tiyak na ang pagbabalik ng mga bombay na nagpa-5'6. Tiyak na ang pagdami ulit ng krimen dahil sa balik na ulit sa pakikipagpatayan sa kahirapan ang mga tao. Dadami ang mahihirap na hindi naman natutulungan ng gobyerno sa tunay na sitwasyon (wag mo'kong sabihang 'magsikap ka at wag iasa lahat sa gobyerno). Obligasyon ng gobyerno ang pagtulong sa mahihirap, pero sa kasamaang palad tila ito pa ang nagpapahirap sa buhay ng ordinaryong pilipino. Paano ko nasabi? Napakahirap magtanim ng palay, napakamahal ng abono at midisina na pangpatay insekto. Pero bakit ang mura ng presyo ng palay? Ng copra? Ng mga gulay? Pero kapag binili mo na sa mga palengke at tindahan halos triple na ang presyo ng mantika at bigas? Naniniwala ka ba talagang walang magagawa ang gobyerno para makontrol ang presyo ng bilihan ng palay at copra? Ako naniniwalang hindi priority ng gobyerno ang mahihirap. Nakatuon lang ang atensyon nila sa mga interest na mapapakinabangan din nila.
Inuulit ko, hindi ako myembro nang kung ano mang investment na yan, pero nakita ko talagang may malaking naitulong sa buhay ng mahihirap ang mga nabanggit. Alam ko rin na may hangganan ang kanilang operasyon at babagsak din pagdating ng panahon. Pero sana hinayaan nalang sila, hinintay nalang sana ng gobyerno ang mismong pagbagsak nila, kung babagsak man. Sila ang nagpuno sa kakulangan ng gobyerno, sila ang nagpagaan sa bigat na dinadala ng maraming tao. Higit sa lahat may nabago sila sa nakakarami. Higit sa lahat hindi ako anti-Duterte. Goodluck nalang at God bless mahal kong Mindanao.
No comments:
Post a Comment